lalkhiangte's weblog

#ChurchBullies

Posted in Uncategorized by gkhiangte on November 4, 2015

Tute nge Church Bully te chu?

Khawvelah hian ‘Bully’ hi an tam khawp mai a. ‘Bully’ tih chu Mizo tawng chuan mi endawngtu, mi tihrehawmtu, hnuaichhiahtu, midangte mahni thuhnuaia dah tum rantu tih te pawhin a sawi theih awm e. Mizote hi Kohhran chhungkuaa awm leh khawsa kan ni deuh ber mai  ti ila kan ti sual thui awm love. Kohhranah hian hetiang kan sawi ‘Church Bully’, kohhran zinga tel pawh ti nuamlo rum rum hi an awm em tih han thlir dawn teh ang.

  1. Mahni thu duhte:

Kohhran rawngbawlna peng hrang hrangah rawngbawltuten thahnemngai takin hna an thawk thin a, a ropui hle. Hetih rualin thenkhat chu thahnemngaih luat lutuk vang nge ni midangte ti tuilo thei hial khawpin hma an la thin a. Midangte ngaihdan lak pawh hrehin, mahni thiamna leh finna hmangin hmasial takin thu an ti tlu thin fo. Kohhran Committee zingah pawh hetiang mahni thuduh leh mahni tha tih ang agenda kaltlangpui duh tlat an awm thin. Upa zingah pawh mipuite kheuh thiam riau ang chi an awm ve fo.

  1. Rawngbawltu senior intite: 

Rawngbawlnaah a lo tel hnem tawh leh tel rei tawh te an awm teh meuh mai. Anni tel lo chuan Kohhran rawngbawlna pawh thui tak a kal theih awm love. Amaherawhchu, thangthar leh kohhrana lo tel thar leh in hmang tharte tan an hnawksak ve duh fo. Committee-na hrang hrangah an tel kim lawi si a, midangte thu ngai chang lovin, anmahni lo hriat hnem tawh atangin thurel an ti tlu fo. Member dangte rilru senna tur zawng zawng an dal thin bawk. Inthlahrung takin a la junior deuh ten an ngaihdan an han sawi ve dek dek a, anlo hau ti tih zel duh mai bawk a, hei hian rawngbawlna a tithuanawp duh chawk.  Tin, Rawngbawltu senior thenkhat thu duh takte hian ‘kan ti hnem tawh alawm’ ti ni awm takin kohhran hnatlang emaw chet velna reng rengah, an che tha duh lem lo bawk. Tawng erawh an chuh fo zui.

  1. Sawisel sur sur tute:

Kohhran chu Kohhran Hruaitute Committee hrang hrang thurel bawhzuia kal leh hmasawn a ni a, hemi kawngah hian kohhran mipuite hian chanvo kan nei ve a. Hruaitute thurel lo zawma, lo bawhzuipui hi a ni. Kan duhdan ang kherin an rel lo ang, mihring chi hrang hrang awm khawm kan ni a, duhdan leh ngaihdan a inang thei lo hrim hrim. Chutiang kara mipui zinga lo tawngthei fal emaw hruaitute thurel lo sawisel rengtu an awm thin. Heng mite hi kohhranah an hnawksak duh hle. Midangte rilru sukthlek an ti chingpen duh bawk. A hunlaia mahni rilru sawi chhuak duh silo leh hruaitute pawhin an ngaihdan an zawh laia engmah sawi tha duh silo an ni duh chawk. Mahni puak chhuaka rilru senga thurawn tha tak pek tur nei chuang silova, eng pawh lo sawisel ching an ni duh bawk.

  1. Mi incheidana lo buaite:

Kohhranah hian a mak khawp mai, Pathian be tura kal theuh theuh, kan agenda erawh a dang thei hle awm e. Thenkhatin, rilru leh tihtakzeta Pathian pawlna an neih laiin, mi inchei dan ringawt lo buaipui an awm thin. ‘Chumi khami pawnfen chu a chhing lutuk, a sam tihdan a maksak lutuk’, tih tein an lo khei nasa thin hle. Heng mite hian Kohhrana tel an ti nuamlo thei hle. Thinlung chhungril lam en lova pawnlam lan dan ringawt lo buaipuitute hi mi mita khanchhuk la chhuak hmasatute chu an ni mai lawm ni?

  1. Langsarh duh luatte:

Kohhran rawngbawlna hi Lal Isua khawngaih rawngbawl hna ani tih hai khawpa mahni lansarh duh vang leh miten tha min ti se tih ni awm taka rawngbawltu an awm bawk. Heng mite hian anmahni hmalakna tih lansarh an ching hle a, mite fak hmain anmahni leh anmahniin an in fak zung zung thin. An hmalakna chu a tha lo pawh a ni lo, mahse ‘mahni in fak leh sakhi ngalah engmah a bet lo’ tih an sawi angin miin engahmah an ngaihloh phah fo. Rawngbawltu dangte hmalakna chu thlawp tha duh chiah silo leh lawmpuina pawh hrilh duh manglo anni duh bawk.

Heti zawng hi tun tumah chuan lo sawi ta  ila, a dang pawh in hre treuh awm e. Engpawhchu ni se, Church Bully nihloh i tum theuh ang u!

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s