lalkhiangte's weblog

Kritikal Kristian

Posted in Uncategorized by gkhiangte on October 31, 2015

Mizo Kristiante hi ‘critic’ țha kan ni em?

(As published on Emmau Vol. XXVI No.20. 2014. A Bi-monthly Bulletin of KTP Kulikawn Branch) 

He thupui ‘Kritikal Kristian’ tiha ka rawn dah hi a sap tawng chuan ‘Critical Christian’ tihna a ni mai a. A Mizo tawng taka dah dawn chuan Pu L. Keivom ziak dan ang takin “Kritikal Kristian” tih te pawhin a dah theih awm e. A thumal ‘Kritikal’ tih hi sap thumal ‘Critical’ emaw ‘Critic’ tih atanga lak a ni a, chumi awmzia chu mi lehkha ziak emaw artiste-te thiltih  endika sêl tu tihna a ni ber a. Entirnan, film chhuak thar apiangte lo en a, a hmuhnawm leh hmuhnawmloh thu tehna hrang hrang hmanga ziaka sawi thinte an ni. A film siamtute tan heng ‘critic’ ho hi a chang chuan an hnawk duh thin hle reng a ni. ‘Critic’ zingah awmze nei tak leh zahawm taka endik thin an awm laiin, a tam zawk hi chu sawisel satliah peih tak tak an awm bawk. Chung mite chu film siamtute tan an ngeiawmin, an film ti hming chhetute pawh an ni thei hial awm e.

Keini Kristiante pawh hi kan nitin nun, kan rawngbawlnaah hian ‘critic’ kan lo ni ve thei reng mai a. ‘Critic’ tha nge kan niha ‘critic’ tha lo tih erawh kan in zawh fo a țul ngei ang! Kan kristian pui te kan va endik ang hian keimahni lam hi endik kan cho ve em? Mi thusawite leh an chetziate kan lo thlirin, kan lo en chîkin, eng nge an sawi leh dawn a, an tihleh dawn tih chângin kan lo in ring reng thin lo maw?

Tirhkoh Paula pawh kha a hun laiin, Korinth khuaa mi thenkhatin anlo sawisel nasa hle a, an sawiselna tam zâwk chu hetiang hi a ni:-

a)      Paula lehkhathawn te chu a khauh a, mahse a takah a âwmnêm a, a țawng pawh a sitawm (2 Korinth 10:10)

b)      Paula kha hruaitu tha a ni lo, lam hla atang chauhin a huai, a takah chuan a nêm leh duai (2 Korinth 10:10)

c)      Paula kha  thusawi a thiam lo (2 Korinth 10:10)

d)     Paula kha a rinawm lo (2 Korinth 1:17)

e)      Paula khan Korinth kohhran atanga sum-a tanpuina a lak duhloh avangin an ngaihdan a ni lo (1 Korinth 9: 1-10)

f)       Korinth kohhran kha Paula kaihhruaina hnuaiah khaw dang kohhran aiin a theuneu zâwk (2 Korinth 12:13)

g)      Paula kha Tirhkoh ni turin a tling lo (2 Korinth 11:5)

A chunga tarlan ang hian Paula khan sawisel a hlawh nasa ve hle a. An sawiselna ho hi en ta ila, a dik chiah em? A ‘fair’ em? tih kan hretthiam thei awm e. Hetia insawisel vak vak hian inpumkhatna a tichhe thei hle a, kohhran-a kan rawngbawlna pawhin harsatna a tawk nasa thei hle.

Tũn hun hi lo en ta ila, ringtute hi Korinth khuaa mite ang hi kan lo ni ve mai em? Mi tihsual châng rengin kan khawsa em? Bible-a kan hmuh angin Pharisaite pawhin Lal Isua leh a zirtirte tihsual châng rengin an mit leh beng an lo chhit țhin kha! Mizo ringtute zingah pawh mahni țhuthmun ațanga sawisel thiam kan tam hle. Khawvel thiamnate lo sangin, social networking site-ah te ‘armchair critics’ kan tih mai mahni țhuthmun ațanga sawisel thiam em em kan tam ta tial tial mai chu a ni e. A sawia sawithiam mai ni lo, a sawia sawisel thiam; a tiha tih ni lo, a tiha tihnawk thiam kan tam ta hle. Matthaia 12:30 ah  chuan  “Tu pawh ka lama tang lo chu mi do an ni; tu pawh mi lâk khâwmpui lo chuan an tidarh a ni” tih kan hmu a, kan sawisel ringawta a siam that lam kan thawh si loh chuan, a tidarhtu mai kan ni tih a chiang hle. Khawvela kan awm chhung chuan mihringin harsatna leh duhthusamlohna kan nei ngei ang, sawisel pawh a theih awm e, mahse, kan dinhmun theuha kan lungawilohna (problem) a awm chuan a siamthatna(solution) erawh kan zawng ngei tur a ni. A ‘committee’ a tel si lova, kan lo sawisel vak vakte hi a fel ber lo mai thei e. Thil țha zawk leh tihdan tha zâwk kan hria a nih chuan inhrilh tawn mai hi a fuh zawk hmel. A ni lo va, sawi ringawta, a chhe lai siamthatu kan nih leh si loh chuan, hmabak ropui tak kan thlen a rinawm teh chiam lo. Hnam changkâng zâwkte tihdan lak pawh hi a țha zawk lawm mawni le ka ti țhin? Hmai chhanah an in hrilh pawp mai a, a hnuleha sawi chhunzawm vak tur a awm tawh chuanglova, rilru-ah an pai reng tawh lo a ni. Taksa leh thlarau hriselna atan pawh hetianga tih chîn hi a țhat zâwk ngei a rinawm. Lang tlang taka nun mai hi a hahdamthlak zâwk bawk ngei ang le.

Ringtute hian midang kan va sawiselna ang bawk hian keimahni leh keimahni hi insawisel emaw inbihchiang ngam ta zawk ila, kan thlarau nun tan leh nitina kan nun kawngah pawh hma kan sâwn ngei ang tih ka ring tlat. ‘Critic’ țha ni tur chuan mahni kan in man chian hmasak a tul awm e. Bible pawh hian mahni inbihchianna (Self Introspection) hi a lo ngai pawimawh hle ni tur a ni, hmun tam takah kan hmu a, hetiangin:-

Thufingte 21:2

Mi tin awm dân hi mahni mitah chuan a dik tih a ni a; Nimahsela, Lalpan thinlung a bũk thin.

I Timothea 3:9

Chhia leh tha hriatna thiangin rinna thurũk chu pawm mi an ni zâwk tur a ni.

Galatia 6:3-4

Mi, eng mah ni si lovin, mi lian deuhva a inruat chuan mahni a inbum mai a ni. Mi tinin mahni thiltih fiah theuh zawk rawh se, chumi hunah chuan midang chung ni lovin, mahni chung chauhvah chhuan tur a nei ang.

2 Korinth 13:5

Rinnaah chuan in awm emaw, nangmahni ngei inchhin thin ula; nangmahni ngei infiah thin rawh u. A nih loh leh, nangmahniah Isua Krista chu a awm tih nangmahni ngeiin in hre fiah lo vem ni?

1 Petera 1:10,11

In chunga khawngaihna lo thleng tur thu hril lawktu zawlneiten, Krista Thlarau anmahnia awm chuan Krista tuarna turte chu a hriat lawktir laite khan, eng hun nge ni, eng ang hun nge ni a hriattir thin tih chhui chhuah tumin, chu chhandamna chanchin chu an zawng a, ngun takin an chhui thin.

Ringtute chu kan ringtupuite dâwm kâng tu tur kan ni a, kohhranah pawh kan in țanpui tawn dial dial tur a ni. Pathian duh dan lova thil tisualtute chu hmangaihna nena an thatna tura kan thunun a nih si loh chuan, kan lo ngaimawh viau a, kan lo sêl vak hian awmzia a nei thui awm lo ve. Rom khuaa mite hnenah heti hian Tirhkoh Paula chuan lehkha a thawn a, “Chuvangin, I insawisêl tawh suh ang u, tu pawhin mahni unau dâlna emaw, tlũkna emaw siam loh tum zawk rawh u”. Rom 15:1-2 ah chuan heti hian Paulan a sawi leh a: “Chutichuan, keini mi chakte hian mahni lâwmna zawng lovin, mi chak lote chak lohnate chu kan tuarpui zâwk tur a ni. Mahni vêngte tihsâwt nan an țhatna turin tihlâwm I tum țheuh ang u.”

Jakoba 4:11-12 ah heti hian kan hmu a:-

“Unaute u, insawichhe tawn suh u. Tu pawhin a unau a sawichhiatin emaw, a unau a sawisêlin emaw, Dân a sawichhiain Dân a sawisel a ni; nimahsela, Dân I sawisêl chuan Dân zâwmtu I ni lo va, rorêltu I ni zawk e. Dân petu leh rorêltu pakhat chauh a awm, chhandam theia tiboral theia chu. Nang thenawmte sawisêltu chu tu nge maw I nih le?”

Matthaia 12: 35 ah chuan ti hian kan hmu leh a:-

“ Mi țha chuan a ro bâwm țha ata thil țhate a theh chhuak thin a, misual chuan a ro bâwm chhia ata thil chhiate a theh chhuak thin. Tin, ka hrilh a che u, mi ten thu lawilo an sawi apiang, chũng thu chu rorêl niah chuan an sawi fiah a la țũl ang. I thu chuan thiam a chantîr ang chia, I thu vek chuan thiam loh a chantîr bawk dâwn che asin”.

Midangte dik lo taka kan hêk emaw kan sawisêl vak vak hian keimahni mawng  kan hlim mai a tih theih awm e. Rorel niah chuan kan tehna ngai bawkin minla teh vek dawn si a. Chuti taka mahni leh mahni kan inbihchian theih chuan, midangte kan hrethiamin kan ngaidam thei dawn a lo ni a. Kan zui ber Lal Isua hian midangte ngaidam thei turin min fuih nasa hle a. Ngaidamtu dinhmun hlu tak min neihtir te hi kan ngaihpawimawh thiam chu a țul hle ang. Rang taka midang thil tihsual kan va dem vak hian Lal Isua lâwm zâwng a nih a rinawm lem lo. Ringtute berin midang kan ngaihdam theih tlat loh chuan, tunge maw ngaidam chuang ang le? Matthaia 7: 1-5 a kan hmuh angin keimahni tihsual leh tlinlohna hi chu kan hmu mawh duh khawp mai a, midangte tlinlohna chhe te erawh chu kan hmu zung zung lawi si.

Lehkhaziaktute leh Pharisai vervêkte ang khan pâwn lamah kan lo duh tui viauvin, midangte kan lo hmu tlinglo viau thei a, mahse,  keimahni thinlung chhungril berah chuan vervêkna leh sualnain kan lo khat reng thei a lo ni. Kan Lal Isua-in lehkhaziaktute leh Pharisai vervêkte a hauhna kha hre reng ila, “Nangni hruaitu mitdel, thosi thli faia sanghawngsei lem si thinte u!” min tih loh nân Lal Isuan dân thu pawimawh zawk a tih te- felna te, khawngaihna te, rinawmna te chu ngaihpawimawh zawk I tum theuh ang u! (Matthaia 23: 23-27)

A tawp berah chuan keini Kritikal Kristian te hi ‘critic’ țha-‘Ngaidamtu Kristian’, mahni leh mahni in bih chiang ngam kristiante kan nih țheuh theihna turin Lalpa Thlarau Thianghlim chuan mal min sawm sak theuh rawh se!