lalkhiangte's weblog

it can be better

Posted in Uncategorized by gkhiangte on February 23, 2010

Mizorama ka Krismas hman dan chu a tha in a nuam khawp mai. Ni 24 zan chu kan veng KTP huaihawtin Hermon Childrens’ Home ah naupang kan hman pui a, a nuam ve khawp  mai. He hmun kan thlen hmaa kalkawnga ka thil hmuhte ka ziak chak a, ka rawn ziak ve anih hi.

Kan veng atanga car-a kan kal chu, khawlaiah rawlthar leh tleirawl vei vak an tam hle a. Khua lah chu a vawt em em a, lum zawh loh hlauvin, kawr lum engemawzat ka hak thuah tun a, kut kawr nen. Chutia vawt em em hnuaiah chuan, kan mizo thalaite chuan vawt tih hmel pawh pu chuang lovin, tualah an leng hai hai mai. Mahse, a nawm hmel vak chuang lo. Khawlaia engmah tihtur hre lova vah tlaivar zak chu kei atan chuan peih awm loh tak a ni. Ka inngaihtuaha, ka khawngaih ta em em a. Aizawlah hian thalaite tan hian inhmuhkhawmna tha leh hmun nuam hi a awm lo anih loh chuan a vang hle a, chuvang chuan thiante pawh hi duh tawka inkawm theih lohna chin a awm.

Hetia zana thleirawlte an chhuahna chhan hi an lerh vang ringawt anih ka ring lo. Nu leh pate tihbuai theih lohna hmuna  awm an chak  ve  tho niin ka hria. Thil sual ringawt ti tur hian kan beisei a, a lo ni vek bik kher lo. Thalai nih chuan, intihhlim te kan duh ve a, taksa sawizawi te kan duh ve a. Nu leh pate leh khawtlang hian chutiang hmun “space” chu min pe hrang bawk si lova, awm dan hriat a har  ani.

Kan thangtharte tan hian kan khawtlang hian hmun zahawm tak leh tha tak a siam chu a tul ngei ang le. Mizo kan nih avanga heng a hnuaia thilte hi kan hman (access) theih loh bikna ka hre lo:

  1. Infiamna park puitling tak; skateboard leh roller skates theihna, cycle khalh theihna, naupang te zawkte infiam theihna tur.
  2. Cinema theatre lian tha tak, thianghlim taka vawn that

Thil dang tam tak pawh a la awm thei ang. Mahse, heng ka rawn sawi hi chu a pawimawh hmasa ka ti. Thalaite tan taksa sawi zawina tha tak a ni dawn a, tha riau ang. Tunah erawh chuan, Millenium Center elevator-a chuan chhoh leh chhuk te ania kan insawizawi dan. Kan thalaite leh naupangte kan khawngaihthlak lutuk tawh. Mihring nih chuan, mahni in chhunga in hmuam up renga awm hi a har em em a, chuvang tak chuan taksa tana hrisel bawk si infiamna hmun tha tak hi chu kan mamawh. Indoor leh outdoor stadium lam ka sawi lo. Inkhel thinte kalna nilo, mipui vantlang, a bik takin thalaite  intihhlimna leh inlakthawvenna hmun lam ani ka sawi.

Mizo thalaite hi zaithiam an tam tawh bawk si, han intih hlimna leh zaina “jam” na hmun lah vang bawk. Biak In lah “jam” na hmun ni mang bawk silo, kan khawngaih thlak ve tawh bawk viauvin ka hria kei chuan. Engtikah tak thleng ang maw?